១៩- សាមគ្គីរឹងមាំសមនឹងឈ្មោះល្អ

សត្វគោមាឌតូចតែមានអំណត់              ក្របីធំធាត់តែចាញ់កំដៅ

សត្វរុយវារោមព្រោះមានដំបៅ         គេស្គាល់ក្រយៅព្រោះឃើញមារយាទ។

សត្វសេះឥតស្នែងរាងខែងសមរម្យ         ក្របីស្នែងធំរាងសមនឹងមាឌ

រស់ក្នុងសង្គមសមនឹងមានញាតិ             ផ្ទះមិនចង្អៀតសមម្ចាស់ចិត្តល្អ។

ជនខ្វះអំណត់សមនឹងអត់សីល              រីជនខូចខិលសមមិនស្គាល់ធម៌

បុគ្គលបួសប្លមសមអត់ចីវរ                    ចិត្តនៅញាប់ញ័រសមនឹងចង់ធំ។

តាបសសង្រួមសមនឹងខន្តី                     សច្ចំក្នុងព្រៃសមសីលឧត្តម

បើចិត្តនៅអៀនរៀនធ្វើឱ្យសម                សាមគ្គីរឹងមាំសមឈ្មោះប្រពៃ។

ការងារឧត្តមសមនឹងចំណេះ                 ខំរៀនទើបចេះសមមានតម្លៃ

សង្រួមបានល្អសមធម៌វិន័យ                  សីលទានល្អក្រៃសមសទ្ធាមាំ។

ដោយឧបាសក គុយ   សុធន

(សៀវភៅជំនួយសតិភាគទី ៥, ទំព័រ២៤៥)