៦៧- ព្រះធម៌ជាស្ពាន

គេងគិតរាល់ថ្ងៃស្រមៃចង់បាន                ក្នុងចិត្តគិតស្មានថាបានដូចប៉ង

តែក្តីប្រាថ្នានិងគោលបំណង                  ជាខ្សែដែលចងសត្វលោកគ្រប់គ្នា។

សូមជនអ្នកអានបានសុខប្រពៃ               រួចផុតទុក្ខភ័យចង្រៃនានា

ទ្រព្យពុំប្រសើរស្មើនឹងសទ្ធា                    រសព្រះធម្មាឈ្នះរសអ្វីៗ ។

សូមកុំកើតជាអ្នកសទ្ធាក្រ                      ឥតចេះអក្សរឥតធម៌វិន័យ

ជីវិតនៅរស់បាត់អស់ស្មារតី                   មានទ្រព្យច្រើនក្តីក៏ឥតខ្លឹមសារ។

សូមសាធុជនធ្ងន់ក្នុងទានសីល               ជម្រះមន្ទិលចម្រើនមេត្តា

សូមកុំមាក់ងាយព្រះពុទ្ធសាសនា            ព្រោះតែដោយសារកំហុសអ្នកកាន់។

ដោយឧបាសក គុយ   សុធន

(សៀវភៅជំនួយសតិភាគទី ៧ ទំព័រ ២២០)