៣៣- នៅតែមិនរាង

រឿងពីព្រេងព្រឹទ្ធបណ្ឌិតថ្លាថ្លែង              ក្តីសោកសង្រេងតែងជួបប្រទះ

សព្វសត្វក្នុងលោកសន្និវាស                  ជួបតែវិនាសប្រទះតែព្រួយ។        

ម្ល៉ឹងងហើយមិនព្រមចុះញ៉មអ្នកណា       កិលេសតណ្ហាឆ្ងាញ់ផ្អែមរលួយ 

កុសលមិនសាងបន់ឱ្យព្រះជួយ              ឥតគិតភ័យព្រួយថ្ងៃមួយមរណា។

ពេលឈឺម្តងៗភ័យអើយសែនភ័យ          ជរារាល់ថ្ងៃឥតគិតអនិច្ចា

ប្រាថ្នាតែឆ្ងាញ់បំពេញតណ្ហា                 ឥតធម៌មេត្តាប្រាថ្នាខ្ពង់ខ្ពស់។

វត្តឥតរៀនសូត្របាត់បង់ធម៌អាថ            កុលាបឥតផ្កាបាត់បង់សម្រស់

ប្រព្រឹត្តទុច្ចរិតបាត់បង់កិត្តិយស              កាន់ធម៌សប្បុរសពិតរស់មានន័យ។

រទេះឥតកង់បាត់បង់ខ្លឹមសារ                 ទូកឥតច្រវាបាត់បង់សេរី

បព្វជិតឥតខ្មាសបាត់បង់វិន័យ               សីលឥតខន្តីបាត់អស់គុណធម៌ ។

ដោយឧបាសក គុយ   សុធន

(សៀវភៅជំនួយសតិភាគទី ៥, ទំព័រ២៥៨)